Middle-English - Sir Patrick Spens
The king sits in Dumferling toune,
   Drinking the blude-reid wine:
O quhar will I get guid sailòr,
  To sail this schip of mine?
Up and spak an eldern knicht,  5
  Sat at the kings richt knee:
Sir Patrick Spens is the best sailòr
  That sails upon the se.
The king has written a braid letter
  And signed it wi' his hand,  10
And sent it to Sir Patrick Spence,
  Was walking on the sand.
The first line that Sir Patrick read,
  A loud lauch lauched he;
The next line that Sir Patrick read,  15
  The tear blinded his ee.
O quha is this has don this deid,
  This ill deid don to me,
To send me out this time o'the yeir,
  To sail upon the se?  20
Mak hast, mak haste, my mirry men all,
  Our guid schip sails the morne.
O say na sae, my master deir,
  For I feir a deadlie storme.
Late late yestreen I saw the new moone  25
  Wi' the auld moon in hir arme,
And I feir, I feir, my deir mastèr,
  That we will com to harme.
O our Scots nobles wer richt laith
  To weet their cork-heild schoone,  30
Bot lang owre a’ the play wer playd
  Thair hats they swam aboone.
O lang, lang, may thair ladies sit
  Wi’ thair fans into their hand,
Or eir they se Sir Patrick Spence  35
  Cum sailing to the land.
O lang, lang may the ladies stand
  Wi’ their gold kems in their hair,
Waiting for their ain deir lords,
  For they'll see thame na mair.  40
Half owre, half owre to Aberdour,
  It’s fiftie fadom deip:
And thair lies guid Sir Patrick Spence,
  Wi’ the Scots lords at his feit.